ព្រះរាជាណាចក្រកម្ពុជា

ជាតិ សាសនា ព្រះមហាក្សត្រ

             រាជរដ្ឋាភិបាល

      ក្រុមប្រឹក្សាអភិវឌ្ឍន៍កម្ពុជា

គណៈកម្មាធិការនីតិសម្បទា និងអភិវឌ្ឍន៍កម្ពុជា

សេចក្តីប្រកាសព័ត៌មាន

          នារសៀលថ្ងៃទី ២៩ ខែ មីនា ឆ្នាំ ២០១៦ នៅវិមានរដ្ឋាភិបាល (ទីស្តីការក្រុមប្រឹក្សាអភិវឌ្ឍន៍កម្ពុជា) គណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សា អភិវឌ្ឍន៍ កម្ពុជា (គ.ជ.នា/ក.អ.ក) ដោយមានកិច្ចសហការជាមួយស្ថានទូតអូស្ត្រាលី បានរៀបចំកិច្ចប្រជុំគណៈកម្មាធិការគ្រប់គ្រងកម្មវិធីការ វិនិយោគក្នុងវិស័យហេដ្ឋា រចនាសម្ព័ន្ធ (Investing- In Infrastructure - 3i) ។ កិច្ចប្រជុំនេះដឹកនាំរួមគ្នាដោយឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអម​​នាយករដ្ឋមន្ត្រី និងជាអគ្គលេខាធិការ គ.ជ.នា/ក.អ.ក និង លោកស្រី Ruth Stewart អនុប្រធានបេសកកម្មនៃស្ថានទូតអូស្ត្រាលីប្រចាំនៅកម្ពុជា និងជាប្រធាន ទទួលបន្ទុកកិច្ចសហប្រតិបត្តិការអន្តរជាតិអូស្ត្រាលី ។ ឯកឧត្តមរដ្ឋលេខាធិការក្រសួងឧស្សាហកម្ម និងសិប្បកម្ម ឯកឧត្តមរដ្ឋលេខាធិការក្រសួងរ៉ែ និងថាម ពល ឯកឧត្តម អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងមន្ត្រីបច្ចេកទេសទាំងខាងកម្ពុជា និងអូស្ត្រាលី ព្រមទាំងប្រធាននិងមន្ត្រីគ្រប់គ្រងកម្មវិធី បានចូលរួមក្នុងកិច្ចប្រជុំនេះ ។

          អង្គប្រជុំបានផ្តោតការពិភាក្សាលើរបៀបវារៈ ៤ គឺ ៖ 

          ១-របាយការណ៍វឌ្ឍនភាពការងារក្នុងឆមាសទី ២ ឆ្នាំ ២០១៥

          ២-ផែនការសកម្មភាព និងថវិកាឆ្នាំ ២០១៦

          ៣-នីតិវិធីនៃការជ្រើសរើសប្រតិបត្តិករឯកជនសម្រាប់អនុវត្តគម្រោង

          ៤-លក្ខខ័ណ្ឌយោង និងសមាជិកភាពនៃគណៈកម្មការវិនិយោគរបស់កម្មវិធី ។

          កិច្ចប្រជុំបានដំណើរការដោយរលូន និងផុលផុស ក្នុងស្មារតីនៃភាពជាដៃគូ និងទទួលបានលទ្ធផលប្រកបដោយផ្លែផ្កា ។ អង្គប្រជុំបានពិភាក្សា និងអនុម័តរបាយការណ៍វឌ្ឍនភាពការងារក្នុងឆមាសទី ២ ឆ្នាំ ២០១៥ ផែនការសកម្មភាព និងថវិកាសម្រាប់អនុវត្ត កម្មវិធី ឆ្នាំ ២០១៦ ដោយបានកំណត់ អភិក្រមក្នុងការគាំទ្រវិស័យអគ្គិសនី និងទឹកស្អាត ឤទិភាព និងនីតិវិធីនៃការជ្រើសរើសប្រតិបត្តិករ ដែលមានសក្តានុពលសម្រាប់អនុវត្តកម្មវិធី ព្រមទាំង លក្ខខ័ណ្ឌយោង និងសមាជិកភាពនៃគណៈកម្មការវិនិយោគរបស់កម្មវិធី ។

          រាជរដ្ឋាភិបាលកម្ពុជា និងរដ្ឋាភិបាលអូស្ត្រាលីបានចុះហត្ថលេខាលើកិច្ចព្រមព្រៀងសម្រាប់អនុវត្តកម្មវិធីវិនិយោគក្នុង វិស័យហេដ្ឋារចនាសម្ព័ន្ធ នាថ្ងៃទី ២១ ខែ កញ្ញា ឆ្នាំ ២០១៥ ។ គោលបំណងចម្បងនៃកម្មវិធីនេះ គឺការកសាងប្រព័ន្ធចែកចាយ ថាមពលអគ្គិសនី និងការផលិតទឹកស្អាត និង ការកសាងប្រព័ន្ធចែកចាយនៅតាមទីប្រជុំជន និងតំបន់ជនបទ ដើម្បីឱ្យប្រជាជន មានលទ្ធភាពប្រើប្រាស់កាន់តែប្រសើរជាងមុននូវសេវាទាំងនេះ ក្នុង គោលដៅបន្តលើកកម្ពស់ជីវភាពរស់នៅរបស់ប្រជាជន ។ លើសពីនេះ កម្មវិធីក៏ជួយជំរុញគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥ តាមរយៈការប្រើប្រាស់ ប្រតិបត្តិករឯកជនសម្រាប់អនុវត្តគម្រោងផងដែរ ។ កម្មវិធីនេះនឹងផ្តល់ហិរញ្ញប្បទានឥតសំណងប្រមាណ ៣៤ លានដុល្លារអូស្ត្រាលី សម្រាប់រយៈពេល ៥ ឆ្នាំ គិតចាប់ពីចុងឆ្នាំ ២០១៥ ។ ផ្អែកលើវឌ្ឍនភាពនៃកម្មវិធី រដ្ឋាភិបាលអូស្ត្រាលីបានសម្រេចផ្តល់ថវិកា បន្ថែម ១១,៣៨ លានដុល្លារអូស្ត្រាលី ។

          ប្រទេសអូស្ត្រាលី គឺជាដៃគូដ៏សំខាន់ ដែលបានផ្តល់ហិរញ្ញប្បទានជាច្រើនសម្រាប់ចូលរួមស្តារ និងអភិវឌ្ឍសង្គម-សេដ្ឋកិច្ច កម្ពុជា ។ រហូតមក ដល់ឆ្នាំ ២០១៥ រដ្ឋាភិបាលអូស្ត្រាលីបានផ្តល់ហិរញ្ញប្បទានឥតសំណងប្រមាណ ៨២៣ លានដុល្លារឤមេរិក ។ ក្នុងឆ្នាំ ២០១៥ រដ្ឋាភិបាលអូស្ត្រាលី បានផ្តល់ហិរញ្ញប្បទានឥតសំណងចំនួន ៤៥ លានដុល្លារឤមេរិក ។ ហិរញ្ញប្បទានទាំងនេះត្រូវ បានប្រើប្រាស់សម្រាប់គាំទ្រដល់វិស័យឤទិភាព គឺ វិស័យកសិកម្ម និង អភិវឌ្ឍន៍ជនបទ ហេដ្ឋារចនាសម្ព័ន្ធ សុខាភិបាល ច្បាប់ និងតុលាការ ។ រាជរដ្ឋាភិបាលកម្ពុជាបានវាយតម្លៃខ្ពស់ចំពោះភាពជាដៃគូ និងកិច្ចសហការល្អរវាងប្រទេសទាំង ២ និងសូមសម្តែង អំណរ​​គុណចំពោះរដ្ឋាភិបាល និងប្រជាជនអូស្ត្រាលី  ដែលបានបន្តផ្តល់ហិរញ្ញប្បទានដ៏ថ្លៃថ្លា សម្រាប់គាំទ្រដល់កិច្ចប្រឹងប្រែងរបស់ រាជរដ្ឋាភិបាល ក្នុងការសម្រេចគោលដៅអភិវឌ្ឍន៍សង្គម-សេដ្ឋកិច្ច និងការកាត់បន្ថយភាពក្រីក្រនៅកម្ពុជា ។

រាជធានីភ្នំពេញ ថ្ងៃទី ២៩ ខែ មីនា ឆ្នាំ ២០១៦